Şaredarîya Amedî ya Şaristanê Girdî, Farqîn de di rayîranê resê pêroyî yê neweyan de ke 24 dewa û 12 hezar kesî gêna xo mîyan, otobusan dest bi xizmetê şarî kerd.

Serekîya Daîreya Resî ya Şaredarîya Şaristanê Girdî, merkez û qezayan ra teber, seba xizmetê resê pêroyî yê dewan xebatan kena. Di otobusî ke Hemşaredara Şaredarîya Şaristanê Girdî Serra Bucak 22ê Teşrîna Peyêne de zîyaretê xo yê Farqîn de ca de kontrol kerdî û di rayîranê resê pêroyî yê 85 km de wezîfedar bîyî, dest bi seferan kerd. Xizmetê resî ke merkezê Farqînî ra dest pêkeno û mabênê dewan de yeno dayene, pêro pîya 12 hezar kesî do ey ra îstîfade bikerê. Di otobusî, mîyanê hewte de her roje saete 06:00 ra heta 17:30î do xizmetê şarî bikerê.

Rayîro 45 km 14 dewî gêno xo mîyan

Rayîrê resê pêroyî yo newe ke Farqîn ra dest pêkeno û heta dewanê Yolaçî, Yukariveysî, Pinarî, Aşagiveysî, Umurî, Erîkyazî, Qaracalerî, Sulaxî, Bereketlî, Eşme, Saxlixî, Toklucan, Gormezî û Yolarasî dewam keno, 45 km yo.

Rayîro dîyin 40 km derg o

Rayîrê resê pêroyî yo dîyin zî 40 km derg o û 10 dewan gêno xo mîyan. Rayîro ke Deha Dagcileran ra dest pêkeno û dewanê Uçdirekî, Qasa, Bablasî, Bayrambaşî, Onbaşilerî, Keklîkdereyî, Boyunlî (Boşat), Qayadere, Çardaxî ra vîyareno, heta merkezê Farqînî şino.

'Şarî rê xeyrên bo'

Muxtarê Dewa Yukariveysî Mehmet Siddiq Bugdaycî xizmetê resê pêroyî ser o qisey kerd û va heya nika reyêk zî wina xizmet nêdîyo la nika hem otobusî est ê hem zî rayîrî est ê û ma semedê şarî xeyr biwazê, îhtîyacê şarî ame temînkerdene.

'Ma bawer kenê ke heme waştişê ma do bêrê temînkerdene'

Bugdayciyî bale ant ke ewro îmkan çin o la demê ameyoxî de hûmara wasitayan û seferan eşkena bêro zêdekerdene û wina va: "Dew û mezrayî est ê ke otobusî nêeşkenê şêrê. Nika dewe de 5 keyeyî est ê, rayîr 3 km cor ra şino. Ma wazenê ke rojanê ameyoxan de seba 4-5 dewanê bînan ke problemê resî ancenê zî sefer bibê. Seferanê neweyan rehetîye arde. Kesê ke erebeyê înan çin bî, kesê ke îmkanê înan çin bî. Wendekar û kokimî nêewtanaynê karê xo bikerê; kesê ke waştêne şêrê nêweşxane yan zî mekteb, zehmetî antêne. Ma Şaredarîya Şaristanê Girdî û Şaredarîya Farqînî rê sipas kenê. Ma bawer kenê ke rojanê ameyoxan de heme waştişê ma do bêrê temînkerdene."

'Xebatê ma do dewam bikê'

Serekê Daîreya Resî Temel Cengîzî zî dîyar kerd ke çarçeweya xebatanê problemê resî yê dewan de Farqîn de seba rayîranê resê pêroyî yê ke dewanê Bereketlî û Daglîca de dîyar bîyê, di otobusî ameyî dayene. Cengîzî wina qisey kerd: "Nê otobusî do teqrîben xizmetê 12 hezar kesan bikerê. Xebatê ma yê derheqê halkerdişê problemanê resî yê merkezê bajarî, qezay û dewan de do dewam bikê."