Performansê "Gong"î yê hunermende Fîlîz Bozkuş Al, Roja 1. yê Tîyatroyê Cinîyan ê Amedî de ke hetê Tîyatroyê Şaristanî yê Şaredarîya Amedî ya Şaristanê Girdî (DBŞT) ra yeno organîzekerdene, resaye temaşekerdoxan.

Hunermende Fîlîz Bozkuş Al ke xelata Kaykeranê Cinîyan a Xelatanê Tîyatroyî yê Ozdemîr Nutku 2023î ya, performansa xo ya reqsî "Gong" Merkezê Kultur û Kongre yê ÇandAmedî de mojna û temaşekerdoxî kerdî tesîrdar. Performansî de ke dîzaynê roşnî û vengî Kerem Alî kerdo û manena yew ayîn û rîtuelî, meseleyêka pîlbîyayîşî ke parçeyanê bîyayîş, domanî-qijî, ciwanî, cehdê averşîyayîşê rayîrî, mecburîyetî, vindîkerdişê îrade/vindîbîyayîş, mucadeleyê merdimîye reyde sîya xo/xirabîya xo, krîz, vurîyayîşî ra yena pê, ameye vatene. Hunermende Fîlîz Bozkuş Al ke peynîya kaye de destê nuştoxe Şenay Tanrîvermîş ra plaket girewte, dîyar kerd ke a keyfweş a ke Amed de nê performansî mojnena û resena temaşekerdoxan û va "Ez zaf sipas kena tîyatroyê şaristanî rê ke no atmosfero muhteşem viraşto û no dem dayo ciwîyayene."

'Mi 3 xezîneyan ra rayîr girewte û dîzayn kerd'

Peyê kaya yew perde ke 40 deqeyî ramite, sohbetî de tesîrê performansî ke temaşekerdoxan ser o viraşto ame munaqeşekerdene. Hunermende Al va ke aye ganî-ruh-mezg manaya pêrabîyayîşî de "3 xezîneyan" ra rayîr girewte û dîzayn kerdo û wina dewam kerd: "Wexto ke ez nê 3 xezîneyan reyde resaya têhet, meseleyê Gongî şekil girewt. Sewbîna, seba ke mi weçîna ke ez domananê xo ra biewnîya, 8 serrî sahne ra dûrî menda. Enerjîyo ke zerreyê mi de kom bîbî, pandemî de êdî nêeşka cayê xo de vindero û 2022 de fîtîlê Gongî zî pişt."