Şaredarîya Amedî ya Şaristanê Girdî, seba ke gedeyî hem keyf bikerê hem zî aktîvîteyanê fîzîkî û zihnîyan de ca bigîrê, "Şayîya Wisarî ya Gedeyan" ke do 4 rojan dewam bikero, daye destpêkerdene.

Serekîya Daîreya Xizmetê Sosyalî, Serekîya Daîreya Xizmetê Ciwan û Sporî, Serekîya Daîreya Karanê Kultur û Sosyalan, Serekîya Daîreya Xizmetê Astengdar û Pîran û Serekîya Daîreya Çapemenî, Weşan û Têkilîyanê Şarî bi hemkarîya û bi piştgirîya şaredarîyanê qezeyan, "Şayîya Wisarî ya Gedeyan" ke mabênê 19-22ê Nîsane de, 4 rojan bajar do bêro organîzekerdene, dest pêkerd. Fealîyetan ke Simerpark, taxa Huzurevlerî û Merkezê Kongre û Kulturî yê Çand Amedî de ameyî organîzekerdene, Serekê Daîreya Xizmetê Sosyalî Serap Yildirim û bi hezaran gedeyî beşdarê ci bîyî.

Gedeyan hem keyf kerd hem zî musayî

Fealîyetî ke taxa Yenîşehîrî de Cayê Ciwîyayîşê Hemparî yê Sumerparkî de bi akerdişê nawitgehê hunerî dest pêkerdbî, tede gedeyî beşdarê kodkerdişê robotîkî, rîtm, resim, hunerê ebrû, drama û atolyeya felsefeyî bîyî.

Gedeyanê ke Cayê Ciwîyayîşê Hemparî yê Sûmerparkî de bi aktîvîteyanê fîzîkî û zihnî desteg da averşîyayîşê xo, Parka Aştî ke taxa Huzurevlerî ya qezaya Kayapinarî de ya, uca futbol, basketbol, tenîsê kort, dart, parkurê dêsê vejîyayîşî, parkurê keyeyê sungî, tenîsê masa, langirt, boyaxkerdişê rî û şayîya muzîkî reyde keyf kerd.

Gedeyî, Merkezê Kongre û Kulturî yê Çand Amedî de zî, bi fîlmê anîmasyonî "Şînok", keyf kerd û sînema temaşe kerd.

'Ez zaf keyfeş bîya, gedeyî keyf kenê'

Gedeyan dîyar kerd ke fealîyetî ke ameyî organîzekerdene ê keyfweş kerdî û waşt ke fealîyetî dewam bikerê.

Gedeyî ke beşdarê fealîyetan bîyî, înan ra Berat Sevîmî dîyar kerd ke fealîyetêko zaf rind ameyo organîzekerdene û va: "Ez zaf keyfeş bîya. Gedeyî zaf keyf kenê û tîya zaf rind o."

Emine Ozen ke gedeyan ra yew a, îfade kerd ke aye firsend dîyo ke kay bikero û va ez zaf keyfweş bîya.

'Ma bi fealîyetan kulturê xo hîna rind şinasna'

Vildan Levent ke seba fealîyetan ke ameyê organîzekerdene, sipasîya Şaredarîya Amedî ya Şaristanê Girdî kerd, wina qisey kerd: "Fealîyetê ke Şaredarîya Şaristanê Girdî organîze kerdî, tede ma kulturê xo hîna rind şinasna. Ma tîya govendî girewtî. Eynî wext de ma xeylê kayî kay kerdî. Mi zî ê kayan ra keyf girewt, gedeyan zî keyf kerd."