KevneHevserokê Şaredariya Bajarê Mezin a Amedê Selçuk Mizrakli yê ku ji Girtîgeha Girtî ya Ewlehiya Bilind a Tîpa F a Edirneyê hat berdan, hat Amedê. Ji bo Mizrakli li Balafirgeha Amedê bernameya pêşwazîkirinê hat çêkirin. Di pêşwazîkirinê de Hevseroka Şaredariya Bajarê Mezin a Amedê Serra Bucak, Hevberdevkên Meclisa ŞBM'ê Demet Ceylan û Ayhan Karatekîn, hevserokên şaredariyên navçeyan, parlamenter, endamên meclisê, Cîgirên Sekreterê Giştî yên ŞBM'ê Zerîn Turk, Muhabbet Erdogmuş û Ozlem Tekîn, serokên daîreyan, nûnerên partiyên siyasî û rêxistinên civaka sivîl û welatî amade bûn.

‘Pêwîst e aştî di hafizeya civakî de cih bigire’

Mizrakli di bernameya pêşwazîkirinê de bi gotina “Merheba bajarê bîr û evînê” dest bi axaftina xwe kir. Mizrakli derbarê Pêvajoya Aştî û Civaka Demokratîk de nirxandin kirin û diyar kir ku divê di riya çareseriya aştiyane, demokratîk û bi rûmet de israr bê kirin. Mizrakli anî ziman ku aştî tenê di wê rewşê de dikare wateya xwe ya rastîn hebe ku di hemû çînên civakê û hafizeya civakî de cih bigire û di heman demê de xwedî taybetmendiyeke wiha be ku paşerojê ava bike; her wiha bal kişand ser giringiya birêveçûna vê pêvajoyê li ser zemînekî pêbawer û rastîn. Mizrakli destnîşan kir ku wekî daxwaza hiqûqa biratî û aştiyê, azadkirina siyasetmedar û girtiyên di girtîgehan de jî yek ji hêmanên giring ên vê pêvajoyê ye.