Şaredarîya Amedî ya Şaristanê Girdî, 3ê Kanûne Roja Astengdaran a Dinya de 3 cayanê cîya-cîyayan ê bajarî de standan akeno û bale ancena heqanê şarê astengdaran ser.

Şaredarîya Şaristanê Girdî, seba ke standardê cuyayîşê kesanê astengdaran baş bikero û beşdarîya înan a cuya komelkî zêde bikero, xebatanê xo dewam kena.

Serekîya Daîreya Xizmetanê Astengdar û Kokiman, 3ê Kanûne Roja Astengdaran a Dinya de bi sloganê "Seba astengdaran cuyêka newîye mumkin a" Cadeyê Gazî, Cadeyê Yaşar Kemalî û AVM Ceylan Karavilî de standî akerdî û broşurê derheqê heqanê astengdaran de vila kerdî.

Hedef no bî ke bi melumatanê ke perwerde ra bigîre heta îstîhdam, xizmetanê sosyalan ra bigîre heta destegê ekonomîkî ameybî pêşkêşkerdene, şarî de hişmendî bêro viraştene.