Festîvala Tîyatroyî ya Amedî ya 10. ke Şaredarîya Amedî ya Şaristanê Girdî organîze kena, Merkezê Kultur û Kongre yê Çand Amedî de dest pêkerd.

Hemşaredar Doğan Hatun ke beşdarê resepsîyonê festîvalî bî, îfade kerd ke Amed de bi hezaran serran ra zaf ziwanî est ê û va: "Hunero ke zaf ziwan û zaf kulturan xo de hewêneno, do hertim Amed de dewam bikero."

Tîyatroyê Şaristanî ya Şaredarîya Amedî ya Şaristanê Girdî (DBŞT) ke binê banê Serekîya Daîreya Kultur û Karanê Sosyalan de xebatan keno, emser bi sloganê "Çiraya Me Geş Dibe (Roşnîya Ma Zêde Bena)" Festîvala Tîyatroyî ya Amedî ya 10. organîze kerd û pê resepsîyonê ke Merkezê Kulturî û Kongre yê Çand Amedî de virazîya, dest pêkerd.

Hemşaredar Hatunî va ke sey şaredarî verê weçînayîşî soz dabî şarî û va ke ê do pê kultur û hunerî şaristanî reyna virazê. Hemşaredarî va ke tîyatro roşnî yo û ameyoxî de zî ziwanê Kurdkî, Tirkî û Armenîkî de kayî do bêrê kaykerdiş û no yew nîşane yo ke şaristanê ma de zaf ziwanî û kulturî eşkenê pîya biciwîyê.

Festîval do 9 rojan, yanî 25ê Nîsane ra hetanî 4ê Gulane dewam bikero. Festîvalî de do hem kayê tîyatro yê Kurdkî, Tirkî û Armenîkî bêrê kaykerdene, hem zî atolyeyî bêrê viraştene.