Kombîyayîşê hempare yê di rojan ê Komîteya Îdare û Konseyî yê UCLG-MEWA ke bi mêmandarîya Şaredarîya Amedî ya Şaristanê Girdî virazîya û nêzdîyê 30 şaredar û hemşaredarê şaredarîyanê şaristananê girdan ê neteweyî û mîyanneteweyî beşdar bîy, bi serkewtene qedîya. Hemşaredare Bucak dîyar kerd ke kombîyayîş berhemin vîyart û sipasîya xo heme kesan rê ke seba kombîyayîşî kede daya, kerd.

Kombîyayîşê hempare yê Komîteya Îdare û Konseyî yê Teşkîlatê Herêmî yê Rojhelatê Mîyanên û Asya Rojawanî yê Şaristananê Yewbîyayeyan û Rayberîyanê Herêmkîyan (UCLG-MEWA) bi mêmandarîya Şaredarîya Şaristanê Girdî Amedî de ame viraştene. Kombîyayîş ke 23-24ê Teşrîna Verêne de Otelê Wyndham Gardenî de bi temaya 'Dîplomasîya Herêmkî: Awankerdişê Ameyoxê Şaristanan' ame viraştene, tede Hemşaredarê Şaredarîya Amedî ya Şaristanê Girdî Serra Bucak û Dogan Hatun, Serekê UCLG-MEWA'yî yê Pêroyî Mehmet Duman û nêzdîyê 30 şaredar û hemşaredar û mudirê şaredarîyanê şaristananê girdan ê neteweyî û mîyanneteweyî beşdar bîy.

Mêmanê ke ameyî şaristan, bi aktiviteya ke Şaredarîya Şaristanê Girdî organîze kerd, fersendê gêrayîşê cayê tarîx û kulturî yê Amedî dî û derheqê tarîx û eseranê şaristanî de melumatî girewtî.

Akerdişê kombîyayîşî de ke 23ê Teşrîne de dest pêkerd, Hemşaredara Şaredarîya Amedî ya Şaristanê Girdî Serra Bucak, Serekê UCLG-MEWA'yî yê Pêroyî Mehmet Duman, Hemserekê UCLG-MEWA'yî (Tirkîya) û Şaredarê Trabzonî yê Şaristanê Girdî Ahmet Metîn Genç, Hemserekê UCLG-MEWA'yî (Filîstîn) û Şaredarê El Xelîlî Tayseer Abu Sneîneh, Serekê UCLG'yî (Îspanya) yê Pêroyî Emîlîa Saîz, Şaredarê Qonyayî yê Şaristanê Girdî û Serekê Demê 2023-2024 ê UCLG'yî Ugur Îbrahîm Altay, Şaredarê Laheyî û Serekê UCLG'yî (Hollanda) Jan Van Zanenî qisey kerd.

Akerdişî de vengdayîşê aştî

Qiseykerdişê akerdişî de ke problem û rewşa Rojhelatê Mîyanênî ameyî nirxnayene, seba aştî veng ame dayene û muhîmîya averşîyayîşê hetkarîya mabênê şaristan û herêman û tora piştîdayîşî yê mabênê rayberîyanê herêmkîyan ame vatene.

Mesajê hetkarî û piştîdayîşî

Wexto ke program bi Kombîyayîşê Komîteya Îdare û Konseyî yê UCLG-MEWA’yî dewam kerd, Hemşaredarî Serra Bucak û Dogan Hatunî di rojan de şaredarê şaristananê beşdaran û heyetanê înan reyde yew bi yew pêvînayîşî kerdî û mesajê hetkarî û piştîdayîşî dayî.

5 roniştişê cîyayî ameyî viraştene

Roniştişê ke wareyê kombîyayîşî de ameyî viraştene, tede babetê "Komîteya Dîplomasîya Bajarî û Îdarekerdişê Herêmkî ya UCLG-MEWA: Hetkarîya Mabênê Şaristanan", "Dîyalogê Asta Berze: Tesîrê Komelkî yê Rojewanê Globalî", "Nirxnayîşê Herêmkî yê Xoserî (VLR): Nirxnayîşê Rojewanê Globalî", "Komîteya Şaristananê Zîrekan û Mobîlîteya Bajarî ya UCLG-MEWA: Resayîşê Bajarî Herêma MEWA de", "Komîteya Şaristananê Zîrekan û Mobîlîteya Bajarî ya UCLG-MEWA: Dayaxkerdiş û Çareserîyê Zîrekî Şaristanan de" ameyî munaqeşakerdene. Roniştişan de xurtkerdişê rayberîyanê herêmkîyan, resayîşê awanîya hewênayox û domdar, şuxulnayîşê aktîf û berhemin ê çimeyan, şuxulnayîşê zafziwanî xizmetanê rayberîya herêmkî de ser o fikrî ameyî vatene.

Sipasîya Hemşaredaran ameye kerdene

Qedîyayîşê programî de Serekê UCLG-MEWA'yî yê Pêroyî Mehmet Dumanî sipasîya xo Hemşaredarê Şaredarîya Amedî ya Şaristanê Girdî Serra Bucak û Dogan Hatunî rê kerd ke mêmandarîya kombîyayîşî kerda.

Hemşaredare Bucak: Kombîyayîş zaf berhemin vîyart

Hemşaredare Bucak zî dîyar kerd ke kombîyayîşê di rojan zaf berhemin vîyart û va: "Mêmanîya şima tîya de zaf keyf û hêvî da ma. Seba ke ma pîya ameyoxêk awan bikerê û ma biewnîyê aştî ra û pîya qisey bikerê zaf muhîm bî."

Hemşaredare Bucak sipasîya xo Serekê UCLG-MEWA'yî yê Pêroyî Mehmet Dumanî rê ke kombîyayîşî Amedî de asankerdiş kerdo, xebatkarê UCLG-MEWA'yî rê, karkerê Şaredarîya Şaristanê Girdî rê ke wayîrê mêmanan vejîyayî, Yewîya Şaredarîyanê Tirkîya rê ke destegê açarnayîşî dayo, ekîbê teknîkî rê û heme kesê ke seba kombîyayîşî kede daya, kerd.

Program bi antişê fotografê pêroyî yê mêmanan qedîya."