Hevserokên Şaredariya Mezin a Amedê Serra Bucak û Dogan Hatun, bi Nûnera UNFPAya Tirkiyeyê Mariam Khan re hevdîtinek pêk anîn. Di hevdîtinê de, mijarên tenduristiya jinan û wekheviya zayendî hatin nirxandin.

Hevserokên Şaredariya Mezin Serra Bucak û Dogan Hatun li Enqereyê çend hevdîtin pêk anîn. Hevşaredaran, piştî hevdîtinên bi Nivîsgeha Koordînatorê Rûniştî yê Neteweyên Yekbûyî (NY), UNICEF û nûnerên Ajansa Hevkariya Navneteweyî ya Japonyayê (JICA) ya Tirkiyeyê re, bi Nûnera UNFPAya (Fona Nifûsê ya Neteweyên Yekbûyî) Tirkiyeyê Mariam Khan re civîneke berfireh pêk anîn.

Tenduristiya jinan û wekheviya zayendî hat gotûbêjkirin

Di hevdîtinê de, derfetên hevkariyê di warê tenduristiya jinan, wekheviya zayendî û projeyên ji bo komên dezavantaj de hatin nirxandin. Dema ku daxwaza beşdarbûna çalak a şaredariyê di projeyên UNFPAyê de hat destnîşankirin, piştgiriya teknîkî û darayî ji bo xebatên li ser tenduristî û mafên jinan jî hat rojevê.

Di civînê de mijarên wek xurtkirina xizmetên tenduristiyê yên ji bo kêmkirina "mirina dayikan", pêşxistina hişmendiya HPVyê li herêmên gundan, piştgirîkirina projeyên hilberîna pedên ekolojîk û hîjyenîk û organîzekirina bernameyan perwerdehiyê ji bo karmendên şaredariyê hatin gotûbêjkirin.

Tekeza gavên berbiçav

Nûnera UNFPAya Tirkiyeyê Mariam Khan diyar kir ku ew ji nêzîkatiya proaktîf a Amedê ya di mijarên tenduristiya jinan û wekheviya zayendî de kêfxweş in û tekez kir ku ev ê bibe sedema avêtina gavên berbiçav û domdar di van waran de.

Di hevdîtinê de Seroka Daîreya Xizmetên Jin û Malbatê Ozden Gurbuz Sumer, Seroka Daîreya Xizmetên Civakî Serap Yildirim û Serokê Daîreya Lêkolîn û Projeyan Murat Akbaş jî bi Hevserokan re bûn.