Serekê Daîreya Zabita ya Şaredarîya Amedî ya Şaristanê Girdî Veysî Ruzgarî va ke ê seba parkbîyayîşê wesayîtanê tonajgiranan cadeyan kontrol kenê û ganî nê wesayîtî cayê parkî yê munasiban de park bibê.

Ekîbê Serekîya Daîreya Zabita kontrolê wesayîtanê tonajgiranan sey tir, kamyon û dorseyan ke merkezê bajarî de park benê, kerd. Kontrolî de ekîbanê zabita fekkî û nuştekî wayîrê wesayîtan îqaz kerd ke ganî wesayîtê xo cayanê qelebalixan ra wedarnê û cayanê parkî yê munasiban de ronê.

Serekê Daîreya Zabita Veysî Ruzgarî derheqê xebate de malumat da û va: "Kontrolê ma do wesayîtanê tonajgiranan ser o dewam bikê ke cayanê qelebalixan de park benê. Seba ke wesayîtê tonajgiranî trafîko ke bajêr de xora qelebalix o hîna vêşêr asteng kenê, ekîbê ma do saha de bê. Xebatê ma yê trafîkî 24 saetî dewam kenê."