Hemşaredara Şaredarîya Amedî ya Şaristanê Girdî Serra Bucak, Kreş û Keyeyê Miqateyê Rojkî yê Zarokîstanî de etud kerd û waşt ke kreşî seba demê perwerdeyî yê neweyî bêrê amadekerdene.

Hemşaredare Serra Bucak, Kreş û Keyeyê Miqateyê Rojkî yê Zarokîstanî yê Bagcilaran û 450 Keyeyan de ke binê Serekîya Daîreya Xizmetê Sosyalî de xebatanê xo kenê, zîyaret kerd û etud kerd. Hemşaredare Bucak ke derheqê rewşa nikan ê kreşan de serkaranê beşan ra melumatî girewtî, dima sinifê kreşan, odayê rakewtiş, werxane, revîr, salona sporî, odaya muzîkî, salona konferansî û cayê kayê domanan ra gêraye.

Kêmanîyê kreşan do bêrê temamkerdene

Hemşaredare Bucak dîyar kerd ke Kreş û Keyeyê Miqateyê Rojkî yê Zarokîstanî sey serra 2015î nîyê û va ke kreşî bêwayîr ameyê verdayene û ameyê bêfonksîyonkerdene. Bucak îfade kerd ke ê do beşê kreşan ke ameyê bêfonksîyonkerdene, reyna aktîf bikerê, baxçe û cayê kayî do bêrê newekerdene û seba ke kêmanî bêrê temamkerdene û kreşî seba demê perwerdeyî yê neweyî bi hawayêko pêroyî bêrê amadekerdene, beşê eleqedarî wezîfedar kerdî.