Şaredariya Bajarê Mezin a Amedê, bi armanca ku welatî bi zindî dest bi rojê bikin û jiyaneke tenduristtir bimeşînin çalakiyên "Werzişên Sibehê" li dar dixe. Ev bernameya ku ji aliyê Serokatiya Daîreya Xizmetên Ciwanî û Werzişê ve tê birêvebirin; li Parka Bîrdariyê (Anıt Park), Parka Koşuyolê, Parka Temayê û Parka Bajêr bi hevrêtiya rahênerên pispor pêk tê.

Di çalakiyan de ku di rojên heftiyê de her roj di navbera saet 07.00-09.00 de tên lidarxistin, temrînên li gorî temen û rewşa fizîkî ya welatiyan tên dayîn. Ev bernameya ku xebatên germkirinê, nermbûn, hevsengî, koordînasyon û hêzê tê de cih digirin, bi rengekî vekirî ji bo beşdariya welatiyên ji temen û astên fizîkî yên cuda tê meşandin.

'Armanca me ew e ku ew bi zindî dest bi rojê bikin'

Mîne Avşar a ku li Parka Bîrdariyê ya navçeya Yenîşehîrê rahêneriyê ji welatiyan re dike, diyar kir ku xebat bi vî rengî tên kirin da ku welatiyên ji her temenî karibin li gorî asta xwe werzişê bikin. Avşar got, “Em di rojên heftiyê de her roj di navbera saet 07.00 û 09.00 de sibehê werzişê dikin. Armanca me ew e ku welatiyên me yên li vir bi awayekî zindî û bi enerjî dest bi rojê bikin. Em xebatên germkirinê, nermbûn, hevsengî, koordînasyon û hêzê yên ku li gorî temen û rewşa fizîkî ya wan in dikin. Em xebatên xwe bi rengekî ku li gorî her beş û astê be didomînin û balê dikişînin ser wê yekê ku kes û kar li gorî asta xwe tevbigerin.”

'Xebatên me di nava tevahiya salê de berdewam dikin'

Avşar da xuyakirin ku beşdariya birêkûpêk a welatiyan a li çalakiyan ew bi xwe jî kêfxweş dike û wiha axivî: “Yek ji tiştên ku ji bo me herî girîng ew e ku welatiyên me ji xebatên me pir memnûn in. Hatinên wan a her sibehê bi daxwazeke mezin a vir û dîtina werzişa sibehê wekî beşeke ji rojiya wan a rojane, me jî kêfxweş û motîve dike. Xebatên me di nava tevahiya salê de berdewam dikin. Hejmarên me yên beşdariyê jî gelekî bilind in.”

'Dema ku em tên vir moral tê me'

Selma Reşîtoglu ya ku yek ji welatiyên beşdara werzişên sibehê ye, got ku çalakî hem ji aliyê fizîkî û hem jî ji aliyê civakî ve tevkariyê li wan dikin. Reşîtoglu wiha anî ziman: “Em pir kêfxweş dibin ku tên vir û werzişê dikin. Em ji kirina werzişê ya di nava keskatiyê de, bi hevalên xwe re di nava kêfxweşî, rêz û evînê de pir memnûn in. Em li vir ji aliyê têkiliyên malbatî û hevaltî ve ji her tiştî mînak digirin. Dema ku em nayên vir em pir ditengizin. Dema ku em tên vir moral tê me, em dibin xwedî enerjiyeke geştir.”

Reşîtoglu diyar kir ku ew piştî çalakiyên werzişê meşê dikin û got, “Em saet di 07.00 de tên, di 07.30 de dest bi werzişê dikin. Ji bilî vê yekê em 2-3 saetan meşê dikin. Ji ber vê yekê em pir kêfxweş in. Em hêvî dikin ku her dem wisa be.”

'Hem ji bo giyanê me û hem jî ji bo bedena me baş e'

Roza Bagca ya ku bi rêkûpêk beşdarî werzişên sibehê dibe jî da xuyakirin ku çalakî hem ji bo bedena wê û hem jî ji bo giyanê wê baş in. Bagca got, “Ez bi rêkûpêk têm vir. Hevalên li vir pir baş in, mamosteya me baş e. Em bi rêkûpêk temrînan dikin. Ev yek hem ji bo giyanê me û hem jî ji bo bedena me baş e; em şîfa dibînin. Em ji vê yekê memnûn in, em spasiya her kesî dikin.”