Dibistanên Sporê yên Havînê yên ku ji aliyê Serokatiya Daîreya Xizmetên Ciwan û Sporê ve di 1ê Tîrmehê de dihatin destpêkirin, piştî xebatên ku du mehan dom kirin temam bûn. Bi bernameya ku ji bo grûpa temenê 7-17an hat amadekirin hate armanckirin ku zarok betlaneya xwe ya havînê bi spor, perwerde û çalakiyên civakî birêve bibin; geşedana wan a fîzîkî, hişî û civakî bêt piştgirîkirin û çanda sporê bêt belavkirin.

Di 15 branşên cuda de perwerdeya bêpere hat dayîn

Di çarçoveya Dibistanên Sporê yên Havînê de ji bo zarokan di 15 branşên cuda de—ku futbol (jin û mêr), basketbol, volebol, melevanî, atletîzm, tenîs, tenîsa masê, taekwondo, satranç, lîstikên gelêrî, hentbol, kodkirina robotîk, lîstikên hiş û hişmendiyê û jîmnastîk in—perwerdeya bêmberamber hat dayîn.

Di perwerdeyê de ku ji aliyê rahênerên pispor ve dihatin dan, ji bilî jêhatiya sporê ya zarokan, pêşvebirina giyanê tîmê, dîsîplîn, baweriya bi xwe, piştgirî û çanda hevbeş a xebatê jî girîng hat dîtin.

Perwerde di 8 tesîsên sporê de hatin kirin

Perwerdeyên vê bernameyê li Qada Jiyana Hevpar a Sumerparkê, Kompleksa Sporê ya Talaytepeyê, Yekeya 2yan a Çîmê ya Seyrantepeyê, Kordên Girtî yên Tenîsê yên 75an, Sehaya Taxa Yenikoyê, Hewza Vekirî ya Melevaniyê ya Xaniyên Civakî, Kompleksa Sporê ya Gokkuşagiyê û Parka Kardeşlikê hatin birêvebirin.

Bi bikaranîna tesîsên sporê yên li herêmên cuda re hat peydakirin ku zarok di nav navendên nêzîkî cihên xwe yên jiyanê de beşdarî perwerdeyan bibin.

Eleqeya herî zêde ji bo melevaniyê bû

Ji Dibistanên Sporê yên Havînê bi tevahî 8 hezar û 377 zarokî jê sûd wergirtin û eleqeya herî zêde bi 2 hezar û 935 zarokan ji bo melevaniyê hat nîşandan. Di futbola mêran de hezar û 315, di volebolê de 785, di taekwondoyê de 702, di basketbolê de 470, di jîmnastîkê de 376, di kodkirina robotîk de 353, di lîstikên hiş û hişmendiyê de 305, di lîstikên gelêrî de 268, di tenîsa kortê de 257, di satrançê de 237, di futbola jinan de 128, di tenîsa masê de 88, di hentbolê de 85 û di atletîzmê de 73 zarok beşdar bûn.

‘Ji bo 8 hezar û 377 zarokan xebat hat kirin’

Rêvebera Şaxa Sporê ya Sereketiya Birêveberiya Xizmetên Ciwan û Sporê Mizgîn Karaman agahî da û diyar kir ku Dibistanên Sporê yên Havînê yên 2026an temam bûn û got: “Di çarçoveya Dibistanên Sporê yên Havînê de me di 15 branşên cuda de, di nav heşt tesîsên sporê de xwe gihand 8 hezar û 377 zarokan.”

Karaman diyar kir ku wan Dibistanên Sporê yên Havînê bi mebesta ku zarok betlaneya xwe bi awayekî berhemdar derbas bikin û ji alûdebûna dîjîtal û adetên xirab dûr bisekinin organîze kirine û wisa axivî: “Wek Şaredariya Bajarê Mezin a Amedê em sporê wek qadeke ku zarok dikarin xwe tê de bînin ziman, hevaltiyên nû çêbikin û giyanê piştgiriyê geş bikin dibînin.”

Zarokên jêhatî bo klûba sporê hatin gazîkirin

Karaman destnîşan kir ku di çarçoveya bernameyê de gelek zarokên jêhatî hatin keşfkirin û axaftina xwe wisa domand: “Me di çarçoveya Dibistanên Sporê yên Havînê de gelek zarokên jêhatî keşf kirin. Me ev zarokine vexwendin Klûba Sporê ya Şaredariya Bajarê Mezin a Amedê. Em ê van jêhatiyên nû yên ku me keşf kirine, bi branşên xwe yên şareza re bidin nasîn.”

Kelûpelên sporê ji bo zarokan hatin terxankirin

Karaman da zanîn ku di dema perwerdeyê de gelek kelûpelên sporê ji zarokan re hatin belavkirin û got: “Di Dibistanên Sporê yên Havînê de me her cûre derfet ji zarokan re dabîn kirin. Di melevaniyê de bone û berçavk, di futbol, volebol, basketbol, lîstikên hiş û hişmendiyê, taekwondo û satrançê de kelûpelên ku dihatin bikaranîn me ji wan re diyarî kirin.”

‘Em Dibistanên Sporê yên Havînê tenê wek kursgeh nabînin’

Karaman anî ziman ku Dibistanên Sporê yên Havînê ne tenê xebateke perwerdeya sporê ye û wiha got: “Em Dibistanên Sporê yên Havînê tenê wek kursgeh nabînin. Em wê wek qadeke ku zarok xwe geş dikin, xwe tînin ziman û bi giyanê piştgiriyê tên ba hev dibînin.”